電影長短打20090824

第一節
《希魔撞正殺人狂》III級變IIB級，塔倫天奴送級全球影癡的一分禮物，但來到香港竟被發行商打貓偷食？


第二節
睇完《復仇》再睇《機器俠》


第三節
主持人看《復仇》遇上戲院疑似不文事件，從中引伸出對無品觀眾的討論。


第四節
DVD推介：今敏導演動畫作品《千年女優》

電影長短打20090817

第一節
《LAUGHING GOR之變節》--邵氏重投影壇之作，配以TVB嘅製作，竟然只係一部冇咗TV BUDDY LOGO嘅高清台電視電影？


第二節
中文譯名同部戲內容不符嘅《迷失侏羅紀》，原來要Hea住嚟睇先識笑。


第三節
永遠年青的導演John Hughes回顧。


第四節
DVD推介--《末路後庭花》

電影長短打本周DVD推介----<末路後庭花>(The Living End)

1991年, 當烈尼史葛拍咗部女人萬歲嘅<末路狂花>(Thelma & Louise)教全球師奶解放之際, 美籍日裔導演阿拉基旋即作出回應, 以$20,000美金超底成本及16mm菲林拍咗部叫全球同志破櫃立新, 表明立場企硬態度, 大聲高呼我係基我有say嘅同志朝聖極品<末路後庭花>(The Living End).

故事講述被證實染上愛滋的影評人阿Luk在公路上碰上啱啱隊冧差佬嘅愛滋大隻仔阿Jon, 兩個冇明天嘅人走埋一齊, 注定要不惜一切飛越生命盡頭, 正如Jon所講, 要Fuck The World! 不過, 姐手姐腳嘅阿Luk總係船頭驚鬼, 對Jon嘅胡作非為窒頭窒勢, 但同時又對Jon嘅放任不羈步步進逼欲拒還迎, 兩人於是冤冤氣氣踏上沒有盡頭的柏油路, 享受每分每刻都有可能是最後的浮生浪盪.

底成本嘅製作無疑有唔少瑕疵, 例如夜戲唔夠光, 取景較粗糙, 但仍不減其澎湃活力, 特別係90年代初, 大眾媒體仍認為愛滋病係恐慌, 基就係禁忌或者係恥笑嘅題材, 但阿拉基透過本片句句精彩綴核嘅對白同處境大大聲對主流媒體說不, 赤裸裸咁將愛滋病問題及同性戀嘅世界毫不修飾作真實呈現, 狠插社會對同志嘅歧視同偽善, 目的係話你聽同性戀係自然嘅事實, 你不能改變, 你可以繼續故步自封,選擇視而不見, 但別妄想可以排除異己, 扭曲自然. 既然人總要一死, 所以更應爭取自己生存權利! 因此, 可見兩位主角並冇因為被社會邊緣化及活於愛滋陰影下而變得絕望沉鬱, 相反佢哋嘅生命更因此而暴烈燃燒, 一日比一日火光熊熊.

要數片中最具爭議性嘅場面應是猛男阿Jon痛毆奀仔Luk致爆缸暈倒, 眼見血流披面嘅奀仔Luk突然心生憐憫, 伸出舌頭舔舐其傷口的一幕, 廿年後今日睇番依然震撼人心!

以自由奔放, 叛逆不羈為主調, 同時不忘向同志影人如Andy Warhol , Derek Jarman等致敬, <末路後庭花>輕易擊中觀眾及影評人心靈, 片首阿Jon遇上兩名阿嬸級末路狂花, 繼而因緣際會發展成與阿Luk的末路後庭花, 絕對玩味十足, 當年無論攣直與否皆大呼過隱, 編導剪接一腳踢的阿拉基一致被公認才華橫溢! <末路後庭花>的成功亦影響咗阿拉基其後嘅創作,好似<玩盡末世紀>(The Doom Generation), )等都有著本片嘅味道. 而本屆夏日電影節亦會選映阿拉基04年嘅另一經典作品<親密肌膚>(Mysterious Skin), 絕對係唔錯嘅選擇, 大家不妨留意. (辛比)

電影長短打20090810

第一節
《地獄巫門等你來》 --- 究竟經已習慣荷里活大製作的《蜘蛛俠》導演森雷美，今次重投B級恐怖片的成績如何？而本片跟其成名作《屍變》和《鬼玩人》有什麼千絲萬縷的關係？


第二節
《義勇群英：毒蛇風暴》飛天遁地落花流水打足120分鐘，高科技軍事裝備和武器件件夠爆且估佢唔到！節奏拿捏得異常準確，與較早前的《變形金鋼2》簡直高下立見！


第三節
夏日電影節 – 市村隼《常盤莊的青春》 – 黑澤清《東京奏鳴曲》


第四節
LaungGor之變節首映花絮 / 法國電影新浪潮50周年紀念----尚．盧高達

地獄巫門等你來

《地獄巫門等你來》(Drag Me To Hell)由《蜘蛛俠》系列導演森雷美執導的新片，女主角艾麗珊盧曼曾參演《毒自美麗》、《種計》、《大魚奇緣》及《赤裸真相》，男主角積斯汀朗《虎膽龍威4.0》、《收錯愛情風》，更是蘋果電腦的代言人。

電影長短打20090803

第一節
介紹本周上畫電影 : 沖天救兵(3D) /竊聽風雲 /醉爆伴郎團/愛你愛到殺死你.同時細談竊聽風雲

第二節
同大家睇睇《沖天救兵(3D)》，明明阿伯做主角，點解都可大小通吃？《醉爆伴郎團》鬼佬版《最佳損友》對港片的啟示

第三節
夏日國際電影節Harrison的熱情推介

第四節
DVD推介：武智鐵二《黑雪》

電影長短打 DVD推介---《黑雪》

日活公司1965年出品, 亦係粉紅電影教父武智鐵二轟動國際嘅作品. 影片講述日本戰敗後, 於沖繩美軍駐日基地, 青年崎山次郎終日粒聲唔出, 鬱鬱不歡, 只因老母彌須响基地附近經營一所妓院, 同時, 佢阿姨由美亦因成為某美軍高官的情婦而經常晒命, 有咁騎呢嘅家人, 次郎覺得非常刁架無面.

成長中, 次郎見盡妓女們與客人滾紅滾綠, 於虛假嘅笑臉同偽高潮下如何與麻甩佬梅開幾度, 為的只係一張張花碌碌的鈔票, 同希望搭上達官貴人帶她衝出樊籬 , 而當中有不少姐姐仔已响過程中迷失, 沉溺於苦中作樂之中. 唯獨一位叫 靜江的彷如天使般雪白出塵嘅少女深深吸引住佢, 而且, 靜江同次郎皆一樣滿懷心事, 沉默寡言, 故兩人一見如故, 一拍即合.

一天, 靜江被黑人大兵瘋狂蹂躪, 次郎火起, 同時, 自稱共產黨員嘅老友黑瀨慫恿次郎刺殺黑人大兵, 一息間, 極度憤怒加上冚家一直被老美欺凌嗰種長久被抑壓嘅羞辱感瞬間爆發, 次郎決定一刀幹大事!

所謂“黑雪”其實係寓意美國對日本政體、民生等各方面嘅“強姦”,當中將政治民生問題帶入了粉紅電影, 影響咗其後粉紅電影嘅發展, 例如<2度處女go>導演若松孝二的粉紅作品亦滲入剖析赤軍問題嘅原素.

當年<黑雪>响反對日美安保條約的示威集會時上映, 慌死你唔知部戲係反美. 由於敏感題材同大量色情鏡頭被政府 以“猥褻罪”起訴, 影片全部拷貝响日活同武智屋企全被查抄沒收, 武智亦被逮捕. 政府宣報會考慮起訴兩位核准<黑雪>公影嘅電檢審查員, 同時將會嚴厲審查粉紅電影, 旋即成為國際大新聞, 史稱<黑雪>事件.

開庭當日, 作家三島由紀夫(金閣寺) /(假面之告白), 安部公房(沙丘之女) / (他人之顏), 導演大島渚同鈴木清順都响庭上為武智辯護, 武智亦在庭上大膽宣稱反對政治審查制度, 在1965年7月號的《映畫藝術》雜誌上, 武智透露審查員對<黑雪>嘅態度非常強硬, 電影雖然有好多裸露, 但都是心理嘅裸露象徵, 是象徵日本人民面對美國侵略時的無助. CIA和美軍告訴我, 這部電影是不道德, 而武智本人則認為電影嘅情節其實係老生尚談. 江戶時代, 日本政府鎮壓歌舞伎上演時, 以賣淫為理由禁止女人參與演出, 同時亦以同性戀為由, 禁止年輕男子演出, 表面上話係為咗維護公眾道德, 而事實上, 係一種卑鄙嘅政治鎮壓手段.

當然, 裁判的最後, 武智勝訴, 所以, 我哋先可以繼續見到武智之後嘅<戰後殘酷物語>及其往後多部作品, 仲有若松孝二的赤軍粉紅系列, 如<天使之恍惚>等.

講番<黑雪>, 當中實在太多經典場面, 招牌主打莫過於紅千登世飾演嘅靜江被黑人美軍蹂躪之後, 於橫田基地的機場馬路上, 長達5分鍾一SOHT落, 全身赤裸, 崩潰失神, 穿梭於汽車同飛機升降的裸飽場面! 而另外同樣一SHOT落, 主角次郎响酒吧同黑瀨相討刺殺黑人大兵, 同時黑人大兵於同一酒吧的舞池嬉春熱舞, 次郎心情嘅起伏, 與黑人大兵及點人出手的共產黨員黑瀨嘅對比, 亦係影史上一經典場面. 另外, 次郎於戲院內一臉哀怨替靜江手淫, 靜江高潮之時亦正值電影完場燈亮之時, 呢一幕也令人回味無窮. (辛比)

醉爆伴郎團 THE HANGOVER

電影長短打20090801
《醉爆伴郎團 THE HANGOVER》，美國版的《最佳損友》，但玩得比王晶更盡！更癲！準新郎同3條伴郎行禮前夕，隊到醉醺醺失晒魂，點知瞓醒新郎不見兼且個個斷晒片，老虎、BB、暈娜圍住佢哋氹氹轉。為追查老友下落，唯有扮鬼扮馬反轉賭城，被迫踩入衙門刑房、搭上過氣拳王、直搗冒牌春藥黨仲遇上乸型華青幫…荷里活有史以來最激爆喪盡的麻甩喜劇，男人最愛！

冲天救兵 UP

電影長短打20090731
《冲天救兵 UP》，小肥與伯伯的一段不思議南美大冒險，從驚險刺激之中領悟出做人無須太過執着，退一步往往海闊天空，最緊要享受生命中的每一刻，始終美好的回憶才不會隨時間流逝。